Ndugu Wa Mbali

Kila ifikapo mwezi wa nane kuelekea mwezi wa tisa, maelfu ya wanyama pori huvuka anga, vilindi vya mito na vichaka vya Serengeti kuelekea kusini mwa nchi ya Kenya kutafuta malisho mapya katika maeneo ya mbuga ya Maasai Mara. Safari hii kubwa ambayo imejirudia kwa vizazi visivyohesabika ni sehemu ya mzunguko wa asili unaounganisha mbuga hizi kubwa za Serengeti na Maasai Mara, licha ya kuwa maeneo haya yamegawanywa na mipaka ya nchi mbili.

Si wanyama wote hufika, wengine hufia njiani kwa maradhi, majeraha au kushambuliwa na wanyama wengine kwa ajili ya chakula. Wengine huangukia mikononi mwa majangili. Msafara hausimami kupisha maombolezo, wanyama waliobaki huendelea na safari, hawarudi nyuma kwa sababu ya kupoteza mwenzao. Wanyama hawa hutambua kitu kimoja, shida ipo nyuma, changamoto zipo katikati na nuru ipo mbeleni.

Ni uhalisia wa kusikitisha lakini pia ni ukumbusho kwamba dunia inaendelea kusonga. Kila mmoja ana safari yake, hivyo ni muhimu kutambua kesho yako ipo mikononi mwako mwenyewe.

Kwa maelfu ya miaka, mbuga za Serengeti na Maasai Mara zimekuwa zinaunganishwa na tukio hili la uhamaji wa ndege na wanyama pori, hivyo kufanya Tanzania na Kenya kuwa kama ndugu. Haifahamiki idadi ya mbegu za mimea na viumbe mbalimbali zilizosafiri kutoka upande mmoja kwenda mwingine, ila udugu wa asili wa nchi hizi utabakia milele kihalisia na kifumbo.

Nyumbu wakivuka Mto Mara katika Hifadhi ya Taifa ya Serengeti – Tanzania.
(Picha na mtandao).

Katika maisha yetu, safari hizi zinaweza kusomeka kama ishara ya ari ya kupambana kufikia malengo, utayari wa kubadilika na ashki ya kushinda uvivu na kubweteka kabla ya matatizo kufika. Lakini pia hutukumbusha thamani ya ujirani mwema, maana madhira yakiwadia basi pako pahala pa kukimbilia.

Nje ya madarasa na waadhiri waliotuzunguka, ni wanyama ndio wanaotukumbusha ujirani wetu, wanatukumbusha kuwa mipaka ya kiutawala, kiitikadi, kiutamaduni na kidini, tofauti za madaraja ya uchumi na utofauti wa rangi za bendera zetu, ambavyo vingi huishi kwenye fikra zetu tu bado tunahitajiana kwa sababu matatizo makubwa yakifika hayaangalii utofauti wetu..

• Kabla hatujawa Watanzania na Wakenya, tulikuwa wanyama.
• Kabla hapajakuwa na nchi, palikuwepo ardhi.

Sisi ni ndugu wa mbali.

Ndugu Wa Mbali

Ni katika roho hii ya udugu wa mbali ambapo Dizasta Vina (Tanzania) na Kaa La Moto (Kenya) wanakutana. Kama vile wanyamapori wanavyovuka mipaka bila kujali alama za ramani, sauti zao kutoka pande mbili za mpaka uleule, zinaungana kusimulia hadithi moja kupitia muziki.

Huu si mkutano wa wasanii wawili kutoka nchi mbili tu. Ni mkutano wa historia, lugha, utamaduni kwa ujumla. Uzoefu na fikra zilizokua katika pande mbili za ardhi moja.

NDUGU WA MBALI si EP tu.

Ni kumbukumbu ya kimuziki ya uhusiano wa asili kati ya Tanzania na Kenya – uhusiano uliojengwa kwa miaka mingi kupitia utamaduni, historia na asili yenyewe.

Ni safari ya sauti inayovuka mpaka.

Ni hadithi ya watu wawili kutoka pande mbili za mpaka uleule, pande mbili zinazosahau kuwa wao ni NDUGU WA MBALI.

D.V  &  K.L.M